‘A penne nazzechésce cu’ ‘na mane,
dé’ fueche cu’ quedd’otre a’ segarette
quanne hagghie accungertate dó’ versette
e vô’ cu appure ce ‘u curciule ‘ngrane.
Ogn’e menute pare ‘na sumane
e penze… “Mó’ le scette, so’ ciappette!”.
“Am’aggarbá dó’ vjìrse a stu sunette
e tutt’u reste accume sté’ rumane”.
Recame ‘a vesticedde a ‘na terzine,
dé’ luce a ‘n’otre cu’ ‘na pennellate
e ‘n’ota peccennodde lasse ‘u juse.
Tegne ind’ô sanghe ‘a lenga tarandine,
misckate ô latte ‘a mamme me l’ha date:
pure i’ vogghie cu ‘a porte a’ vie de suse.
Glossario
Nazzechésce = muove ritmicamente, dondolare, cullare;
accungertate = acconciato, messo insieme;
appure = verificare, sincerarsi, accertarsi, assicurarsi;
curciule = allievo, discepolo; uccelletto implume;
‘ngrane = progredisce, procede con profitto;
sumane = settimana;
ciappette = versi umili senza alcuna pretesa;
aggarbare = rendere aggraziati, migliorare;
lasse = lascia, abbandona;
juse = abituro, tugurio, abitazione a livello pedaneo;
misckate = mischiato, mescolato.