Le pjìde stanghe, voche passe-passe…
Sott’a le petre l’àrvule e le fiure,
vetrine ‘ngiuppenate de culure,
‘a fodde ca se ‘mbrogghie, fuce e passe,
sbandate accum’ô pèsce ind’a le nasse,
le cemenere fore de mesure
‘ccònzene ‘u cjìle de fumore scure,
spetterre de le sckàtele ‘u frajasse.
Manghe ‘na scame de tand’anne arrete,
d’u munne andiche de le tataranne:
prugresse ié mundevate stu ruete.
…E me ne voche a Tarde vecchie. Fore
da ‘u juse, acquaquagghiate sus’ô scanne,
‘nu chiudde mange pane e pumedore.
Glossario
Àrvule = alberi;
‘ngiuppenate = adornate sgradevolmente, agghindate; vestito goffamente;
fodde = folla, moltitudine;
‘mbrogghie (se) = si mescola disordinatamente, si confonde;
fuce = corre, si muove rapidamente;
nasse = nasse, ceste di giunco per la pesca;
‘ccònzene = acconciano, tingono; accunzare (rifl.) = essere alticcio;
spetterre = trabocca, prorompe;
sckàtele = scatole; si allude alle auto;
frajasse = fracasso, frastuono;
scame = per est. indizio, cenno, segno, impronta; squama, scaglia;
tataranne = vecchietto, antenato, bisavolo, nonno;
mundevate (ié) = viene chiamato, menzionato;
ruete = baraonda, frastuono, chiassata;
acquaquagghiate = accovacciato, seduto;
scanne = panca, panchetto, sgabello;
chiudde = povero pescatore; uomo semplice e buono a nulla.